Tónlistarskólinn byrjar árið af fullum krafti

Þá er skólastarfið byrjað og erum við, kennarar skólans, mjög spennt fyrir komandi skólaári. Allir eiga að vera byrjaðir í einkatímum og tónfræðigreinar byrja fljótlega. Margt spennandi er á döfinni í vetur og má þar helst nefna að haldið verður upp á fimmtíu ára afmæli skólans í febrúar. Jólatónleikar og vortónleikar verða að sjálfsögðu á sínum stað ásamt tónfundum og fleiri uppákomum. Strengjanemendur undirbúa ferð til Akureyrar á strengjamót og Nótan verður á sínum stað eftir áramót. Í þessari viku var foreldravika og voru foreldrar sérstaklega velkomnir og hvattir til að koma með börnunum í tónlistarskólann til að kynnast því hvernig tónlistarnámið fer fram.

Tveir nýir kennarar hafa bæst í kennarahópinn, þeir Hallvarður Ásgeirsson gítarkennari og Kristján Reynir Kristjánsson trommukennari og bjóðum við þá hjartanlega velkomna til starfa. Til stendur að opna facebook-síðu á vegum skólans og rafrænt fréttabréf verður sent út mánaðarlega. Þetta eru liðir í að gera skólann sýnilegri í samfélaginu okkar hér í Skagafirði.

Það er helst í fréttum í byrjun skólaárs að Jón Þorsteinn Reynisson, harmonikkuleikari og fyrrum nemandi tónlistarskólans hélt tónleika á Hofsósi í sumar og rann allur ágóði tónleikanna til skólans. Við þökkum Jóni kærlega fyrir stuðninginn og óskum honum velfarnaðar í öllu því sem hann tekur sér fyrir hendur.

Núverandi nemendur skólans eru strax byrjaðir að koma fram opinberlega, þó skólaárið sé einungis nýhafið. Matthildur Kemp Guðnadóttir fiðlunemandi kom fram fyrir hönd skólans í Verinu föstudaginn 12. september og var sér og skólanum til mikils sóma.  Þá eru tveir nemendur, þær Matthildur og Guðfinna, á leið til Akureyrar um helgina til að taka þátt í verkefni Sinfóníuhljómsveitar Norðurlands. Við óskum þeim góðs gengis og til hamingju með að fá þetta frábæra tækifæri.

Við hlökkum til vetrarins og vonum að foreldrar og nemendur séu sama sinnis.

Kveðja,

Kennarar Tónlistarskóla Skagafjarðar.